काठमाडौं । अन्नपूर्ण पदयात्रा मार्गमा हराइरहेका ७ जनाको खोजी कार्य तत्कालका लागि बन्द भएको छ ।

हरेक दिन हेलिकोप्टर लगेर एक सातासम्म खोज्दासमेत उनीहरुको अत्तोपत्तो नलागेपछि खोजी कार्य तत्कालका लागि बन्द गरिएको हो ।

नेपाली सेनाको नेतृत्वमा खोजी कार्य गरिएको थियो । ३ माघमा आएको भारी हिमपातपछि उनीहरु हिमपहिरोमा परेका थिए ।

तर, त्यसपछि भने उनीहरुबारे कुनै जानकारी प्राप्त हुन सकेको छैन ।

ट्रेकिंग एजेन्सिज एशोसिएशन अफ नेपाल (टान)का अनुसार अब तत्काल उनीहरुको खोजी कार्य सम्भव नभएपछि रोकिएको हो ।

हिउँ पूर्ण रुपमा नपग्लीसम्म खोजी सम्भव नहुने भएको हो । घटनामा ७ जना पदयात्री हराइरहेका छन् ।

त्यसमध्ये ४ जना कोरियाली र ३ जना नेपाली रहेका छन् । उनीहरुको दूर्घटनापछि अन्नपूर्ण पदयात्रा अवरुद्ध भएको छ ।

यसले भ्रमण वर्षको मुखमै शाहसिक गतिविधि प्रभावित भएका छन् ।