काठमाडौं । ठमेलमा असरल्ल अवस्थामा रहेको तार भूमिगत गरी व्यवस्थित बनाउन काठमाडौं महानगरपालिकाले तीन महिनाको समय दिएको छ ।

ठमेलमा अव्यवस्थित तारले यस क्षेत्रको सुन्दरता नै बिग्रिएको भन्दै महानगरपालिकाले आफैले तार काट्न थालेको थियो ।

तर, यसले टेलिफोन तथा इन्टरनेट सेवा नै अवरुद्ध भएपछि महानगरपाकिलाले आफैले तार काट्न छाडेर अवस्थित गर्न अल्टिमेटम दिएको हो ।

बीना समन्वय तार काटेपछि व्यवसायी नै मर्कामा परेका थिए । महानगरपालिकाले यसअघि पनि पटक पटक तार व्यवस्थापन गर्न आग्रह गरेको थियो ।

तर, अटेर गरेपछि महानगर आफैले काट्न थालेको थियो । अहिले इन्टरनेट तथा टेलिफोन सेवा प्रदायक कम्पनीले महानगरसम्म व्यवस्थापनका लागि समय मागेका छन् ।

सोही अनुसार समय दिइएको महानगरपालिकाले जनाएको छ । नेपालमा सबै तार खम्बा गाडेर आकासमा राखिएको छ । यसले शहरी सुन्दरता बिग्रिएको छ । सरकारले क्रमशः तारहरु भूमिगत गर्दै लैजाने नीति समेत बनाएको छ ।