काठमाडौं । सरकारले विमानस्थलसहित हवाई पूर्वाधार विकासमा आगामी ५ वर्ष भित्र ३ खर्ब ३५ अर्ब रुपैयाँ खर्च गर्ने भएको छ ।

नेपाल नागरिक उड्डयन प्राधिकरणले बुधबार एक विवरण सार्वजनिक गर्दै यस्तो जानकारी गराएको छ ।

हवाई पूर्वाधार र जग्गा अधिग्रहणका लागि यो रकम खर्च गर्न लागिएको हो । प्राधिकरणका अनुसार यो रकम भित्रबाटै निगढ विमानस्थलको पहिलो चरणको काम पनि सम्पन्न हुने हुने छ ।

यो विमानस्थलको पहिलो चरणको काम सक्न १ खर्ब ५० अर्ब रुपैयाँ लाग्ने अनुमान रहेको छ । प्राधिकरणका अनुसार अन्तराष्ट्रिय हवाई पूर्वाधारतर्फ २ खर्ब ५० अर्ब रुपैयाँ खर्च हुनेनछ ।

निजगढसहित त्रिभुवन विमानस्थल, पोखरा विमानस्थल र भैरहवा विमानस्थलमा यो रकम खर्च हुने भएको हो ।

जग्गा प्राप्तीमा ५ अर्ब रुपैयाँ खर्च हुने हनुमान छ । आन्तरिकतर्फ हवाई पूर्वाधार निर्माणमा ४६ अर्ब रुपैयाँ खर्च गर्ने सरकारको योजना रहेको छ ।

अब तराईका विमानस्थलमा ठूला जहाजको उडान सम्भव हुने गरी बनाइने छ । पहाड र हिमालमा समेत एटीआर क्षमताका ठूला जहाज उड्न सक्ने गरी बिस्तार गरिने भएको छ ।

आन्तरिक विमानस्थल बनाउने प्रयोजनमा जग्गा अधिग्रहणमा मात्र आगामी ५ वर्षभित्र ३४ अर्ब ६० करोड रुपैयाँ खर्च हुने भएको हो ।

प्राधिकरणका अनुसार पछिल्लो दुई वर्षमा हवाई पूर्वाधारमा ८९ अर्ब रुपैयाँ लगानी भइसकेको छ ।

त्यसमध्ये ठूलो रकम जग्गा प्रात्तीमा खर्च भएको हो । जग्गा प्राप्तीमा ३३ अर्ब रुपैयाँ खर्च भएको छ ।

त्यसमा पनि भैरहवा विमानस्थलमा मात्र २३ अर्ब खर्च भएको हो ।

अन्तराष्ट्रिय विमानस्थलको पूर्वाधार निर्माणमा ४९ अर्ब रुपैयाँ खर्च भइसकेको छ ।

त्रिभुवन विमानस्थल, पोखरा र भैरहवामा यो रकम खर्च भएको हो । आन्तरिकमा साढे दुई वर्षमा जग्गा प्राप्तीमा १ अर्ब र पूर्वाधार निर्माणमा ६ अर्ब रुपैयाँ खर्च भएको छ ।