काठमाडौं । प्रहरी सङ्गठनमा जागिर छाड्ने युवाको सङ्ख्या बढ्दो छ ।

खासगरी एक पटक सुरक्षा फौजमा तालीम प्राप्त गरि अनुभव बटुलेका युवालाइ विदेशमा राम्रो पारिश्रमिकमा काम पाइने प्रलोभनले धेरै युवा पेशाबाट पलायन हुने गरेका छन् ।

नेपालको मगङ्गिमा पारिश्रमिकले खान लाउन, बालबच्चा पढाउन र बाउ आमाको उपचार खर्च नै नधान्ने अवस्था नेपालमा छ ।

त्यसकारण वैदेशिक रोजगारीका लागि जागिर छाड्ने प्रवृती बढेको हो ।

युवाहरुले धमाधम जागिर छाडिरहेका छन्। यसले उनीहरुको तालिममा राज्यले गर्ने ठूलो खर्च खेर जाने गरेको छ ।
धमाधम जागिर छाड्ने युवा बढेपछि नेपाल प्रहरीले जागिर छाड्नु अघि केही नयाँ नियम पालना गर्नुपर्ने प्रावधान ल्याएको छ।

अब प्रहरीमा काम गर्दागर्दै राजीनामा दिन चाहने व्यक्तिले श्रीमतीलाई साक्षी राख्नुपर्ने प्रावधान आएको हो ।

राजीनामा दिनेक्रममा स्वीकृतिसहित स्वयं श्रीमतीलाई उपस्थित गराउनुपर्ने नियम नेपाल प्रहरीले ल्याएको हो ।

परिवारको सहमती बिना नै जागिर छाड्ने र त्यसले पछि पारिवारिक कलह बढाएको गुनासो पछि सङ्गठनले यस्तो नियम ल्याउनु परेको बताएको छ ।

प्रहरी प्रधान कार्यालयका अनुसार अब प्रहरी जवान र हवल्दारले सम्बन्धित जिल्ला प्रहरी कार्यालयमा राजीनामा बुझाउनु पर्नेछ ।

त्यसरी राजीनामा दिँदा श्रीमतीलाई उपस्थित गराउनुपर्नेछ ।

कार्यालयको तथ्यांक अनुसार चालू आर्थिक वर्षको ७ महिनामा १५९२ जना प्रहरीले जागिर छाडिसकेका छन् ।

अघिल्लो वर्ष ३०७३ जना प्रहरीले जागिर छाडेको तथ्यांक कार्यालय सङ्ग छ ।