अहमदावाद । दुई दिने भारत भ्रमणको सिलसिलामा अमेरिकी राष्ट्रपति डोनाल्ड ट्रम्प भारत आइपुगेका छन् ।

सोमबार अपरान्ह अहमदावादस्थित विमानस्थलमा अवतरण गर्दा भारतीय प्रधानमन्त्री नरेन्द्र मोदीले स्वागत गरे ।

भारत सरकारले उनको स्वागतमा अहमदावादस्थित मोटेर रंगशालामा विशेष कार्यक्रमको आयोजना गर्यो ।

यो कार्यक्रमको नाम नमस्ते ट्रम्प राखिएको छ । करीव १ लाख मानिसलाई रंगशालामा उतारेर टम्पको भब्य स्वागत गरिएको हो ।

विमानस्थलदेखि रंगशालासम्म करीव २२ किलोमिटर सडक यात्रा ट्रम्पले गरेका थिए ।

सडकमा उनलाई हजारौं मानिसले स्वागत गरे । पाँच महिनाअघि मोदी र ट्रम्पबीच अमेरिकामा ‘हाउडी मोदी’ कार्यक्रममा भेट भएको थियो ।

ट्रम्प सोमबार बिहान ११.३७ मा एयरफोर्सको विशेष विमान चढेर अहमदावाद एयरपोर्टमा ओर्लिएका थिए।

ट्रम्प परिवार र मोदी अहमदावादमा झण्डै तीन घण्टा संगै रहे । अहमदावाद ओर्लिनेबित्तिकै मोदी र ट्रम्प साबरमती आश्रम पुगेका थिए ।

११ मिनेटसम्म ट्रम्प र मेलिनिया त्यहाँ टहल्लिएका थिए । त्यहा रहँदा ट्रम्पले चर्खासमेत चलाए ।

त्यसपछि नमस्ते ट्रम्प कार्यक्रममा सहभागी हुन अहमदावादको स्टेडियममा पुगेका थिए ।

कार्यक्रममा मोदीले २१ मिनेट र ट्रम्पले २७ मिनेट भाषणा गरेका थिए । ट्रम्पले भाषणका सिलसिलामा भारतीय जनतालाई भनेका थिए, आइ लभ यू इन्डिया ।

उक्त कार्यक्रमपछि आगरास्थित ताजमहल हेर्न ट्रम्प पुगेका थिए । उनी सोमबार नै दिल्ली आएका छन् ।