काठमाडौं । सत्तारुढ नेपाल कम्युनिस्ट पार्टी (नेकपा) अहिले राजनीतिक द्धन्द्ध उत्कर्षमा छ । गुटगत विवाद उचालिएको छ ।

खासगरी राष्ट्रिय सभामा वामदेव गौतम वा युवराज खतिवडा कसलाई लैजाने भन्ने विषयमा विवाद चलिरहेको छ ।

यसै मेसोमा नेकपाका अध्यक्ष पुष्पकमल दाहाल प्रचण्ड भने आरामका लागि सिन्धुपाल्चोकको सुकुटे रिसोर्ट पुगेका छन् ।

जब मुलुकमा राजनीतिक तनावले उग्ररुप लिन्छ, त्यसपछि उनी हरेक पटक सुकुटे पुग्ने गरेका छन्। उनी चितवनबाट सिधै सुकुटे पुगेका हुन् ।

शुक्रवार बिहान काठमाडौं निवासमा नेकपाका नेताहरुबीच गोप्य बैठक गरेका अध्यक्ष प्रचण्ड चितवन पुगेका थिए ।

उनी त्यहीँबाट सुकुटे पुगेका हुन्। सुकुटेमा सुनकोसीमा र्‍याफ्टिङ समेत गरेको रिसोर्टले जनाएको छ ।

शनिवार उनले सुकुटेमा महोत्सव उद्घाटनको कार्यक्रम रहेको छ । यस पटक महोत्सवको बाहना मिलेपनि उनी आरामका लागि सुकुटे पुगेका हुन् ।

यहाँ पुगेपछि प्रचण्डबाट केही महत्वपूर्ण राजनीतिक निर्णय लिने अपेक्षा गर्ने गरिन्छ । अहिले अर्का अध्यक्ष केपी ओली र प्रचण्डबीच सरकार र पार्टी सञ्चालनमा सम्बन्धमा विवाद चर्किरहेको छ ।