काठमाडौं । दक्षिण कोरियाले नेपाली कामदार कम लैजाने भएको छ । आगामी वर्ष दक्षिण कोरियाले ५ हजार ७ सय जना मात्रै कामदार लैजाने जानकारी दिएको छ । अब कृषि क्षेत्रमा कोरियाले कामदार नलैजाने भएको हो ।

एचआरडी कोरियाका प्रतिनिधि र वैदेशिक रोजगार विभागबीच शुक्रबार वार्ता भएको थियो ।

उक्त वार्तामा दक्षिण कोरियाली पक्षले कामदारको कोटा घटाइएको जानकारी नेपाली पक्षलाई गराएको थियो ।

आगामी वर्ष कृषि क्षेत्रमा कामदार नलैजाने भने पनि यसअघि नै भाषा परीक्षा उत्तीर्ण गरेर रोष्टरमा रहेका कामदार भने जान पाउने छन् ।

गत वर्ष नेपाली श्रमिकका लागि १० हजार ५० जनाको कोटा तोकिएको थियो। त्यसमध्ये कृषि क्षेत्रमा मात्र ३ हजार र औद्योगिक क्षेत्रमा ७ हजार ५० जनाको कोटा तोकिएको इपीएस कोरियाको तथ्यांक रहेको छ ।

दक्षिण कोरियाले सन् २००८ बाट ईपीएस भाषा परीक्षा उत्तीण गर्नेलाई कोरिया लैजान थोको हो ।

ईपीएस लागू भएयता ६३ हजार बढी नेपाली रोजगारीका सिलसिलामा कोरिया पुगेका छन्। अहिले करिब ४० हजार नेपाली कोरियामा रहेको अनुमान छ ।

कोरिया नेपालीका लागि आकर्षक रोजगारीको केन्द्र समेत हो ।