मेलवर्न । आईसीसी महिला टी-२० विश्वकप क्रिकेट अष्ट्रेलियाले जितेको छ। आइतबार उसकै मैदानमा भारतलाई ८५ रनले पराजित गर्दै अष्ट्रेलियाले उपाधी जितेको हो । अष्ट्रेलियाले पाँचौ पटक उपाधी जितेको हो ।

समूह चरणमा अष्ट्रेलियालाई भारतले हराएको थियो । तर, फाइनलमा भने घरेलु मैदानको फाइदा उठाउँदै अष्टेलिया हावी भयो ।

मेलवर्न क्रिकेट मैदानमा भएको खेलमा अष्ट्रेलियाले टस जितेर पहिले ब्याटिङ गरेको थियो।

अष्ट्रेलियाले निर्धारित २० ओभरमा ४ विकेट गुमाउँदै १८४ रन जोड्न सफल भयो । १८५ रनको लक्ष्य पछ्याएको भारत १९.१ ओभरमा ९९ रन बनाएपछि अलआउट भयो ।

भारतका लागि दीप्ती शर्माले ३३ रन जोडिन्। वेद कृष्णमुर्तीले १९ तथा रिचा घोषले १८ रन र स्मृति मन्धनाले ११ रन जोड्नु बाहेक अन्यले दोहोरो अंकमा रन जोड्न सकेनन् ।

अष्ट्रेलियाकी मेगान स्कटले ४ विकेट लिइन् । यसअघि पहिले ब्याटिङ गरेको अस्ट्रेलियाका लागि ओपनर बेथ मुनीले सर्वाधिक ७८ रन जोडेकी थिइन् ।