काठमाडौं । कोराना भाइरसका कारण अन्तर्राष्ट्रिय क्रिकेट काउन्सिल (आइसिसी)ले ३० जुनभन्दा अगाडीका सबै प्रतियोगिता स्थगित गरको छ । जसले गर्दा यसबीचमा हुने टी–२० विश्वकप छनोटका खेल प्रभावित भएका छन् ।

आइसीसीले ३० जुन अगाडिका सबै प्रतियोगिता स्थगित गरिएको बिहीबार उल्लेख गरेको छ । आइसिसीले कोरोनासँग विश्व जुँधिरहेको अवस्थामा प्रतियोगिता रोक्नु उचित हुने उल्लेख गरेको छ ।

विश्वभर पछिल्लो समय बढ्दो स्वास्थ्य संकटलाई ध्यानमा राख्दै जुन अन्तसम्म आइसिसीका सबै खाले प्रतियोगिता स्थगित गरिएको आइसीसीले उल्लेख गरेको छ ।

खेलाडी, समर्थक तथा पदाधिकारीको स्वास्थ्य सुरक्षालाई प्राथमिकता दिएर प्रतियोगिता स्थगित गर्नु परेको बताएको हो ।

विश्वभरका सरकारहरूले कोरोनाविरुद्ध गरिरहेको प्रयासमा आइसीसीले एक्यबद्धता समेत जनाएको छ । अवस्था सामान्य नभएसम्म कुनै पनि प्रतियोगिता नहुने आइसीसीले उल्लेख गरेको छ ।