काठमाडौं । सरकारले काठमाडौं उपत्यका बाहिर पनि कोरोनाको परिक्षण हुने गरी सेबा बिस्तार गरेको छ । धरानमा शनिबारबाटै सेवा बिस्तार गरिएको स्वास्थ्य मन्त्रालयका प्रवक्ता डा. विकास देवकोटाले जानकारी दिए ।

उनका अनुसार अब हेटौडा, पोखरा तथा नेपालगन्जमा समेत सेवा बिस्तारको तयारी छ । यसपछि नमुना परिक्षणका लागि काठमाडौं आइरहनु पर्ने छैन ।

प्रवक्ता देवकोटाका अनुसार शनिबारबाट दुई वटा कल सेन्टर संचालनमा ल्याइएको छ । १११५, ११३३ निशुल्क कल गरेर परामर्श लिन सकिने भएको छ ।

आजसम्म कलसेन्टरमा ६ हजार भन्दा बढीले चासो राखिसकेको मन्त्रालयको भनाई छ ।

यसैबीच नेपाललाई आवश्यक स्वास्थ्य सामग्रीको आपूर्तिका लागि नेपाल एयरलाइन्सको जहाज शनिबार नै ग्वांझाउ गएको छ ।

यो जहाज शनिबार बिहान काठमाडौं आइ पुग्नेछ । जहाजमा कोरोनाको परिक्षण सम्बन्धी मेडिकल सामग्री, चिकित्सकको सुरक्षाका साधन तथा किटहरु आउने बताइएको छ ।

आज सरकारले नेपाल एयरलाइन्सलाई चार्टर्ड गरेको हो । अब यसपछि भने निजी क्षेत्रबाट जहाजको चार्टर्ड गरी मेडिकल किट ल्याइदैछ ।