बार्सिलोना । कोरोना भाइरसका कारण विश्वव्यापी आर्थिक मन्दी शुरु भएको छ । यसले संसारभर सबै जसो मुलुक प्रभावित भएको छ । अझ कोरोनाको इपीसेन्टर बनेको स्पेन र इटलीमा त झन भयाभह अवस्था छ ।

यी दुई मुलुक खेलकुद र त्यसमा पनि फूटबलमा लागि संसारमै चर्चित छन् ।

तर, कोरोनाका कारण यो सिजन नराम्रोसँग प्रभावित भएको छ ।  यी दुई मुलुकमा संसारका समकालिन चर्चित दुई फूटबलर लियोनल मेसी र क्रिस्टियानो रोनाल्डोले व्यवसायीक फूटबल खेल्छन् । यी दुई खेलाडीको पहलमा सोमबार दुई सकारात्मक समाचार सार्वजनिक भएको छ ।

मेसीले आफ्ना खेलाडी तथा व्यवस्थापन पक्षबाट बार्सिलोनाका खेलाडीको तलव तत्कालका लागि ७० प्रतिशत कटौती गर्न सहमति जुटाएका छन् । यसले क्लवलाई ठूलो राहत प्रदान गर्नेछ ।

उनले इन्स्टाबाट यो खबर सार्वजनिक गरेका छन् । कोरोनाका कारण लालिगा अनिश्चितकालका लागि बन्द भएको छ । उता, इटालियन क्लब युभेन्टसले खेलाडीलाई चार महिनाको तलब नदिने भएको छ ।

यसका लागि क्लवका खेलाडीले सहमति जनाएका छन् । कोरोनाभाइरसका कारण इटालीको फुटबललगायत सबैखाले गतिविधि प्रभावित भएको छ ।

खेल नभएपछि क्लब धरासायी बन्दै गइरहेका छन् । तलब कटौतीबाट क्लवलाई ९० मिलियन युरो करिब एक अर्ब ४३ करोड राहत हुने भएको छ ।

तलब कटौती गर्ने प्रस्तावमा मुख्य प्रशिक्षक माउरिजियो सारी र स्ट्राइकर क्रिस्टियानो रोनाल्डोले सहमति दिएका थिए ।

अब खेलाडीले मार्च, अप्रिल, मे र जुनको तलब पाउने छैन । कोरोनाका कारण स्पेन र इटलीमा सबैभन्दा धेरै व्यक्तिको ज्यान गएको छ ।