काठमाडौं । सरकारले व्यवसायिक अन्तर्राष्ट्रिय हवाई उडान अवतरण थप १५ दिन प्रतिवन्ध लगाएको छ । यसअघि ३ वैशाखसम्म रहेको प्रतिवन्ध अब वैशाख १८ सम्म पुगेको हो ।
कोभिड–१९ सम्बन्धी उच्चस्तरीय समितिको मंगलबार बसेको बैठकले प्रतिबन्ध लम्ब्याएको हो । सरकारले आन्तरिक उडानका सम्बन्धमा भने कुनै निर्णय गरिसकेको छैन ।
सरकारको यो निर्णयले चार्टर्ड उडान, आकस्मिक अवस्थामा हुने उडान, एयर एम्बुलेन्स र अत्यावश्यक सामग्रीको आपूर्तिका लागि हुने उडान भने रोकिने छैन ।
अहिले नेपालमा रहेका नागरिक फिर्ता लैजान धमाधम चार्टर्ड उडान भइरहेको छ । यी जहाजले विदेशबाट खाली आएर यहाँबाट विदेशी नागरिक भने लैजान सक्छन् ।
