काठमाडौं । सरकारले चिकित्सक र सुरक्षाकर्मीको तलव सुविधा नकाट्ने स्पष्ट पारेको छ । स्वास्थ्य तथा जनसंख्या मन्त्रालयले शुक्रबार नियमित प्रेस ब्रिफिंगका दौरान यस्तो स्पष्टिकरण दिएको हो ।

मन्त्रालयका प्रवक्ता विकास देवकोटाका अनुसार कोरोना कोषमा सुरक्षाकर्मी र स्वास्थ्यकर्मीको तलव नकाटिएको बताए ।

यता, प्रहरी प्रधान कार्यालयले भने यसअघि अधिकृत तहभन्दा माथिका कर्मचारीको तलव कटौती गरी कोरोना कोषमा राख्ने निर्णय गरेको थियो ।

प्रवक्ता देवकोटाले उच्च मनोवलका साथ सेवामा खटिन समेत सबैमा आह्वान गरेका छन् । मन्त्रालयले सेवा बाहिर रहेका र अवकाश प्राप्त स्वास्थ्यकर्मीहरुलाई समेत स्वेच्छिक रुपमा यस अभियानमा आवद्ध हुन पनि आग्रह गरेको छ ।

सरकारका विभिन्न निकायबाट आफ्नो कार्यालयका कर्मचारीको तर्फबाट तलव योगदान भइरहेको छ । कोरोना कोषमा सरकारी निकायबाटै ठूलो सहयोग आएको छ । निजी क्षेत्र भने संकटको बेला पनि मौनजस्तै रहेको छ ।