काठमाडौं । राष्ट्रिय ध्वजाबाहक नेपाल वायु सेवा निगमका दुई वटै जहाज आज दुई गन्तब्यमा उडेका छन् ।

निगमको एक जहाज जापानका करीव २ सय नागरिकलाई बोकेर नारितातर्फ उडेको छ । अर्को जहाज भने चीनको ग्वाङ्जाओ तर्फ उडेको हो ।

चीनबाट यो जहाजले मेडिकल सामान ल्याउने छ । यहाबाट नेपाल एयरलाइन्सले निजी क्षेत्रका व्यवसायीको अर्डरमा सामान ल्याउँदैछ ।

शुक्रबार साँझ ८ बजे निगमको जहाज जहाज जापानको नारिता अन्तर्राष्ट्रिय विमानस्थलका लागि उडेको हो ।

यो जहाज जापानी नागरिकलाई गन्तव्यमा पुर्‍याएर शनिबार नेपाल फर्कने छ ।

नेपाल एयरलाइन्सले जापानको नारितामा गत फागुन १९ गतेदेखि सिधा उडान सेवासमेत थालेको थियो । तर, शुक्रबारको उडान भने र्चार्टड हो ।

निगमको अर्को वाइड बडी जहाज साँझ ६ बजे चीनको ग्वाङ्जाओका लागि उडेको हो । शुक्रबार त्रिभुवन विमानस्थलमा कूल ४ वटा विशेष उडान भए ।

बेलायतको टाइटन एयरवेजले २४२ ब्रिटिश नागरिक लिएर गन्तव्यतर्फ उडेको छ । कोरियन एयरले पनि शुक्रबार कोरियाली नागरिक बोकेर काठमाडौंबाट उडान भरेको छ ।