काठमाडौं । कोभिड १९ संक्रमण नियन्त्रण तथा रोकथामका सम्बन्धमा केन्द्र सरकार र प्रदेश सरकारबीच समन्वयलाई अझ प्रभावकारी बनाइने भएको छ ।

शनिबार प्रधानमन्त्री केपी शर्मा ओलीले सातै प्रदेशका मुख्यमन्त्रीहरुसँग भिडियो संवाद गरेका छन्।

उक्त अवसरमा समन्वयलाई प्रभावकारी बनाउने सम्बन्धमा छलफल भएको छ । प्रधानमन्त्री शनिबार सिंहदरबारस्थित प्रधानमन्त्रीको कार्यालयमा आएका थिए ।

दोस्रो पटक मिगौला प्रत्यारोपणपछि उनी शनिबार दोस्रो पटक नै आफ्नो कार्यालय पुगेका हुन् ।

यसअघि उनले सार्क राष्ट्रका राष्ट्र प्रमुखहरुसँग भिडियो वार्ताका लागि आफ्नो कार्यालयमा पुगेका थिए ।

पछिल्लो समय भने प्रधानमन्त्रीले आफ्नो सक्रियता बढाएका छन् । सोहीक्रममा उनले मूख्यमन्त्रीहरुसँग छलफल गरेका हुन् ।

सिंहदरबारस्थित एक्सन रूमबाट प्रधानमन्त्रीले मुख्यमन्त्रीहरुसँग भिडियो कन्फरेन्स गरेको प्रधानमन्त्रीका प्रेस सल्लाहकार सूर्य थापाले जानकारी दिए ।

मुख्यमन्त्रीसँगको भिडियो संवादमा ओली क्याबिनेटका मन्त्री र सल्लाहकार सहभागी थिए ।

भिडियो संवादमा कोभिड १९ को जोखिम, सुरक्षा रणनीति र दुवै तहका सरकारको तयारीबारेमा संवाद भएको प्रधानमन्त्री कार्यालयले जनाएको छ ।