काठमाडौं । सरकारले लकडाउनमा सवारी पारसको दुरुपयोग बढेको भन्दै पास वितरणमा कडाई थालेको छ ।

अब जिल्ला प्रशासन कार्यालय काठमाडौंबाट मृत्यु संस्कारमा सहभागी हुन जान आफन्तबाहेक अरुले पास पाउने छैनन् ।

लकडाउनका बेला अत्यावश्यक परेको भन्दै सवारी पास बनाउन मानिसहरू कार्यालयमा भीड लागेपछि सवारी पास नदिने कार्यालयले जनाएको छ ।

सहायक प्रमुख जिल्ला अधिकारी कृष्णबहादुर कटवालले बुधबार सूचना निकालेर सवारी पासको माग अत्याधिक बढ्नुका साथै भीडभाड हुन गई लकडाउनसमेत उल्लंघन हुने अवस्था सिर्जना भएकोले आजैदेखि पास बन्द गरिएको उल्लेख गरेका छन् ।

परिवारको सदस्यको मृत्यु संस्कारमा जाने व्यक्तिहरूबाहेक अन्य प्रयोजनका लागि सवारी पास जारी नहुने उनको भनाई छ ।