विराटनगर । उदयपुरमा कोरोना संक्रमण पुष्टी भएका १२ सहित कूल १६ जनालाई विराटनगर लगिएको छ ।

एउटै मस्जिदमा बसेका १६ मध्ये १२ जनामा कोरोना संक्रमण पुष्टी भएको छ । ४ जनामा भने नेगेटिभ देखिएको छ । तर , उनीहरु पनि अब क्वारेन्टाइनमा भने बस्नु पर्नेछ ।

१२ जनालाई भने कोरोना अस्पतालमा भर्ना गरिएको छ । संक्रमण नदेखिएका चार जनालाई मोरङस्थित टाँडीमा बनाइएको क्वारेन्टाइनस्थलमा पठाइएको छ ।

कोसी अस्पताल विराटनगरले कोरोना अस्पतालमा भर्ना भएका बिरामीको उपचारका लागि ५ जना चिकित्सक खटाएको छ ।

त्यहा नर्स र सहयोगी कर्मचारी समेत खटिनेछन् । ४ चिकित्सकले दैनिक ६, ६ घण्टाका दरले ड्युटी गर्ने र एक जनाले चौबिसै घण्टा ड्युटी गर्ने गरी सेड्यूल मिलाइएको अस्पतालले जनाएको छ ।

उनीहरुलाई सात दिनपछि भने होम क्वारेन्टाइनमा पठाइने छ । १२ जनामा शुक्रबार कोरोना पुष्टी भएको हो । उनीहरुमध्ये अधिकांश भारतीय नागरिक हुन् ।