न्यूयोर्क । अमेरिकामा कोरोना भाइरसले मानिसको ज्यान लिने क्रम जारी छ । सोमबार बिहानसम्मको तथ्यांक अनुसार यहाँ मृत्यु हुनेको संख्या ४१ हजार नाघेको छ ।

अमेरिकामा यस भाइरसबाट ४१ हजार ३ सय ७९ जनाको ज्यान गएको छ । यस मुलुकमा ७ लाख ६९ हजार बढीमा कोरोना संक्रमण पुष्टि भएको छ ।

संसारमा बढी मानिस मर्ने र संक्रमित हुने देश अमेरिका हो । यसपछि इटली र स्पेन रहेका छन् ।

राष्ट्रपति डोनाल्ड ट्रम्प अनुसार अमेरिकामा अहिलेसम्म ४१ लाख ८० हजार अमेरिकी नागरिकमा कोरोना भाइरस टेष्ट गरिएको छ ।

उनले कोरोनाविरुद्ध लड्न आवश्यक आर्थिक सहयोगका लागि डेमोक्रेट पार्टीका नेताहरुसँग छलफल गर्ने तयारी समेत गरेका छन् ।

अमेरिका भित्र कोरोनाको इपिसेन्टर बनेको न्यूर्याेकमा पछिल्ला दिनमा संक्रमण नियन्त्रण उन्मुख रहेको त्यहाका अधिकारीहरुले जनाएका छन् ।