न्युयोर्क

कोरोना महामारी पछि लकडाउनको पहिलो ६ हप्तामा न्युयोर्क शहरको क्वीन्समा आत्महत्या गर्नेको संख्या दोब्बर भएको छ ।  गत मार्च १५ आइतबारदेखि अप्रिल २८ तारिख मंगलवारसम्म क्वीन्समा १६ जनाले आत्महत्या गरेको आँकडा मंगलवारबार साँझ क्वीन्सस्थित डिस्ट्रिक एटर्नी मेलिन्दा कार्जले सार्बजनिक गरेकी हुन् । गत बर्ष यही समय अवधिमा क्वीन्समा ८ जनाले आत्महत्या गरेका थिए भने अहिले १६ जनाले आत्महत्या गरेका हुन् । न्युयोर्क सहर भित्रको क्वीन्स क्षेत्र न्यूयोर्क सहरको पाँच वटा संयुक्त सहरी क्षेत्र मध्येको एक हो, जुन आप्रबासीहरुको रोजाईको सहर हो । त्यही रोजाईको सहर पछिल्लो समय कोरोना एपिसेन्टर बनेको छ ।  क्वीन्समा लकडाउन पछिको पहिलो ६ हप्तामा आत्महत्या गर्नेको उक्त संख्या सन् २०१९ को झन्डै आधा बर्षको आत्महत्या गर्नेको संख्या हो । सन् २०१९ को पहिलो ६ महिनामा १७ जनाले आत्महत्या गरेका थिए ।  क्वीन्समा मंगलवारसम्म ४९ हजार जनामा कोरोना संक्रमण पुष्टि भै सकेको छ भने ३ हजार ६ सयको मृत्‍यु भै सकेको छ ।  

डिस्ट्रिक एटर्नी कार्जले क्वीन्समा आत्महत्या गर्नेको संख्यामा देखिएको नाटकीय बृद्धिमा मानसिक समस्याले समेत काम गरेको बताएकी छिन् । उनले यो महामारीमा मानिसमा देखिएको मानसिक समस्या तर्फ पनि ध्यान दिनु पर्ने बताउँदै “आफ्ना नजिकका साथीभाइ इस्टमित्र र छिमेकीको अवस्था पनि यो बिषम परिस्थितीमा बिचार गरौं” भनेकी छिन् ।

तस्विर : डेलिन्यूज