वासिंटन डिसी । अमेरिकी राष्ट्रपति डोनाल्ड ट्रम्प विरुद्ध त्यहाँका तल्लो सदन हाउस अफ रिप्रिजेन्टेटिभबाट महाअभियोग प्रस्ताव पारित भएको छ । उनको कार्यकार्यमा दोस्रो पटक तल्लो सदनबाट महाअभियोग प्रस्ताव पारित भएको हो । बुधबार तल्लो सदनमा भएको मतदानमा महाअभियोगको पक्षमा २३२ र विपक्षमा १९७ मत परेको छ ।

ट्रम्पविरूद्ध बहुमतले पारित भएको महाअभियोग अब माथिल्लो सदन सिनेटमा पठाइने अन्तराष्ट्रिय संचारमाध्यमले लेखेका छन् । अघिल्लो साता संसद भवनमा हिंसा भड्काउन आफ्ना समर्थकलाई उक्साएको आरोप ट्रम्पमाथि
लागेको छ ।

महाअभियोग प्रस्तावमा ट्रम्पको पार्टी रिपब्लिकन पार्टीका १० सांसदले मतदान गरेका छन् । माथिल्लो सदन सिनेटबाट समेत महाअभियोग प्रस्ताव पारित भएमा भने उनी पदच्यूत हुनेछन् । यद्दपी उनको कार्यकाल भने २० जनवरीबाटै सकिने छ । ट्रम्पको कार्यकाल सकिएको अवस्थामा समेत उनीविरूद्धको महाअभियोग सिनेटबाट पारित भए आगामी निर्वाचनमा उमेदवार बन्न उनी असक्षम हुनेछन् ।