काठमाडौं । होली पर्वको दिन ट्राफिक नियम मिचेर सवारी चलाउने १ हजार भन्दा बढी सवारी चालक कारवाहीमा परेका छन् । ट्राफिक प्रहरीका अनुसर यो आंकडा उपत्यकाभित्र गरिएको चेकजाँचको मात्र हो । आज बिहानै देखि काठमाडौंमा प्रहरीले चेकजाँच कडा पारेको थियो ।

महानगरीय ट्राफिक प्रहरी महाशाखाका अनुसार ट्राफिक नियम मिच्ने दुई पाङ्ग्रे ९ सय ५० र ५० वटा चारपाङ्ग्रे सवारी साधनका चालक कारवाहीमा परेका छन् । यसमध्ये ५१ जनाले मादक पदार्थ सेवन गरी सवारी चलाएको पाइएको छ ।

मोटर साइकलमा दुई भन्दा बढी जना राखेर चलाउने, तीव्र गतिमा चलाउने र ठूलो आवाज निकालेर चलाउने चालक बढी कारवाहीमा परेका छन् । कारवाहीमा पर्ने अधिकांश युवा युवति छन् ।

यस बर्षको होलीमा अप्रिय घटनाहरु भने नभएको प्रहरीले जनाएको छ । सरकारले भिडभाड नगर्न भनेपनि बसन्तपुरमा भने एकै स्थानमा ठूलो जमात भेला भई होली मनाएको छ । यद्दपी सडकमा ठूला औपचारिक कार्यक्रम भने आयोजना भएनन् ।