काठमाडौं । कोरोना भाइरसको संक्रमण बढेसँगै नेपालमा निषेधाज्ञा जारी छ । यसको कारणले नेपालमा रोकिएका विदेशी नागरिकलाई सरकारले सहजिकरण गर्ने भएको छ ।

अध्यागमन विभागले एक सूचना जारी गरि १५ वैशाखसम्म नेपालको वैध भिसा भएका र अन्तर्राष्ट्रिय उडान स्थगत रहेको अवधिभित्र वा अन्तर्राष्ट्रिय हवाई उडान सूचारु भएको मितिले सात दिनभित्र नेपालबाट प्रस्थान गर्ने विदेशीको हकमा भिसा शूल्क, विलम्ब शूल्क र जरिवाना नलिइ भिसा नियमित गरिने जानकारी गराएको छ ।

१५ वैशाखसम्म नेपालको वैध भिसा भएका र अन्तर्राष्ट्रिय हवाई उडान सूचारु भएपछि पनि नेपालमै बस्न चाहने विदेशीको हकमा निषेधाज्ञा समाप्त भएको मितिले सात दिनभित्र भिसा नियमित गर्न विभाग वा अध्यागमन कार्यालयमा निवेदन दिएमा विलम्ब शूल्क र जरिवाना नदिई नियमित हुने भएको छ ।

१५ वैशाखसम्म नेपालको वैध पर्यटक भिसा भएका विदेशीको हकमा निषेधाज्ञा अवधिलाई निज पर्यटक भिसामा नेपाल बस्न सक्ने अवधि १५० दिन भित्र गणना नगर्ने निर्णय समेत विभागले गरेको छ ।

अन्तर्राष्ट्रिय हवाई उडान स्थगत रहेकै अवधि भित्र वा सूचारु भएको मितिदेखि सात दिन भित्र प्रस्था गर्ने विदेशीको हकमा अध्यागमन कार्यालय, त्रिभुवन विमानस्थलबाटै भिसा नियमित हुने समेत विभागले जनाएको छ ।