काठमाडौं । संयुक्त अरब इमिरेट्स (यूएई)ले नेपालसहित विभिन्न मुलुकमाथि लगाएको यात्रा प्रतिवन्ध हटाएको छ । कोभिड १९ सङ्क्रमणको जोखिम रहेको भन्दै सो मुलुकले नेपाल र भारतलगायत विभिन्न ६ वटा मुलुकका यात्रुमाथि लगाएको प्रतिबन्ध फुकुवा गरेको हो । कोभिड १९ सङ्क्रमणको विश्वव्यापी महामारीको अवस्थालाई मध्यनजर राख्दै यूएईबाट र यूएईमा आउने-जाने यी मुलुकका लागि प्रतिबन्ध लगाएको हो ।

नेपाल, भारत, पाकिस्तान, श्रीलङ्का, नाइजेरिया र युगान्डाका नागरिकले यूएईको भ्रमण गर्न सक्ने छन् । यसबाट नेपाली कामदार समेत लाभान्वित हुने भएका छन् । यूएईस्थित नेपाली दूतावासका अनुसार अब कोभिड १९ खोपको दोस्रो मात्रा लगाएका वैधरूपमा आवसीय अनुमति पाएका विदेशीले सो मुलुक छिर्न सक्ने छन् । उनीहरुले कोभिडविरूद्धको दोस्रो खोप लगाएको १४ दिन भने कटेको हुनुपर्छ । यहाँ कार्यरत चिकित्सक, नर्स, सरकारी कर्मचारीहरु भने खोप नलगाए पनि यो मुलुकमा छिर्न पाउने भएका छन् ।