काठमाडौं । आईसीसी विश्वकप क्रिकेट लिग–२ अन्तर्गतको त्रिदेशीय एक दिवसीय श्रृङ्खलाको चौथो खेलमा आज नेपाल र ओमान भिड्दा नेपाल उच्च दवावमा हुने छ । लगातार दुई खेल हारेको नेपालले अंक तालीका सुधार गर्न समेत यो खेल जित्नै पर्ने दवाव छ । खेल ओमानको अल अमिरात मैदानमा दिउँसो सवा ४ बजे सुरु हुनेछ । नेपाल यसअघि मङ्गलवार ओमानसँग पाँच विकेटले हारिसकेको छ । लिग–२ मा सन् २०२० मा घरेलु मैदानमा भएको दुई खेलमा समेत ओमानले नेपाललाई हराएको थियो ।

गएको सोमवार भएको खेलमा नेपालले अमेरिकालाई पाँच विकेटले हराए पनि शुक्रवारको अमेरिकाले नेपालाई ६ विकेटले हराएपछि नेपाल दवावमा रहेको हो । लिग–२ मा ओमान १२ खेलमा २० अङ्क जोडेर शीर्ष स्थानमा छ । १५ खेलमा १४ अङ्क जोडेको अमेरिका दोस्रो स्थानमा छ । ७ खेलबाट मात्र ६ अङ्क जोडेको नेपाल पुछारबाट दोस्रो स्थानमा छ । सात टोली रहेको लिग–२ मा शीर्ष हुने तीन देशले सन् २०२३ को जुलाईमा जिम्बाब्वेमा हुने विश्वकप छनोट खेल्न पाउने छन् ।