काठमाडौं । आइसीसी महिला टी-२० विश्वकप एसिया क्षेत्र छनोट अन्तर्गत पहिलो खेलमा नेपाललाई हङकङले ६ विकेटले हराएको छ । हङकङका लागि मारिको हिलले शानदार ब्याटिङ गरेपछि नेपाल पराजित भएको हो । उनले ४२ बलमा ४४ रन जोड्दै जितको आधार तयार पारिन् । नेपालले टस हारेर ३ विकेटको क्षतिमा १०४ रन मात्र बनाएको थियो । जवाफमा हङकङले १८ औँ ओभरमा लक्ष्य भेटायो । नेपाल हङकङ भन्दा बलियो टोली भएपनि पराजित भएको हो ।
पहिलो हारसँगै नेपालको विश्वकप यात्रा कठिन बन्ने देखिएको छ । किनकी यो प्रतियोगिताको शीर्ष स्थानमा रहने टोलीले मात्र ग्लोबल क्वालिफायरमा भाग लिन पाउँछ । एसिया क्षेत्र छनोटमा नेपाल सहित भुटान, हङकङ, कुवेत, मलेसिया र यूएई सहभागी छन्। नेपाल आगामी सबै खेलमा विजय भई हङकङ हारेको अवस्थामा मात्र नेपालको सम्भावना रहन्छ ।
