काठमाडौं । दोस्रो एकदिवसीय क्रिकेटमा जिम्बाब्वे ए विरुद्ध नेपालले सानदार जित निकालेको छ । यससँगै तीन खेलको सिरिज बराबरीमा आएको छ । अब सोमबार जुन टीमले जित्छ, सिरिज सोही टीमको हुनेछ । शनिबार त्रिभुवन अन्तर्राष्ट्रिय क्रिकेट रंगशालामा टस जितेर बलिङ रोजेको नेपालले पाहुना टोली जिम्बाब्वेलाई मात्र ८७ रनमा अलआउट गर्न सफल भयो । तीव्र गतिका बलर चम्किएको खेलमा सोमपाल कामी र करण केसीले ३–३ विकेट लिए ।

कप्तान सन्दिप लामिछानेले २ र सागर ढकालले एक विकेट लिँदा ३१.५ ओभरमा जिम्बाब्वे अलआउट भएको हो । जवाफमा नेपालले झिनो लक्ष्य ११.२ ओभरमा एक विकेट गुमाउँदै भेट्टायो । नेपालका लागि ओपनर आसिफ सेख र सुनिल धमलाले उत्कृष्ट शुरुवात दिलाए । धमला ३८ रनमा आउट भए । सेख ३४ रनमा अविजित रहे । विनोद भण्डारीले अनआउट ४ रन जोड्न सफल भए । नेपाल पहिलो वान डेमा भने पराजित भएको थियो ।