काठमाडौं । अर्थर गनको रुपमा चर्चित अमेरिकी आइडलका फाइनलिस्ट दिवेश पोखरेलको पहिलो नेपाल टुरको कन्सर्ट मिति निश्चित भएको छ ।

अमेरिकन आइडलमा क्रिडेन्स क्रियरवाटर रिभाइभल ब्याण्डको ‘ह्याभ यु इभर सिन द रेन’ गाएर चर्चामा आएका पोखरेल साउन ३१ गते काठमाडौंमा आइपुग्ने निश्चित भएको हो ।

उनले सात सहरमा १० वटा कन्सर्ट गर्दैछन् । उनी देशको काठमाडौंसहित चितवन, पोखरा र बुटवललगायत सहरमा गुन्जिँदै छन् ।

उनको सांगीतिक प्रस्तुति काठमाडौंबाट सुरु हुनेछ । उनले काठमाडौंको क्लब प्लाटिनममा यही अगस्ट २० मा प्रस्तुति दिनेछन् । यसको टिकट बुकिङ खुला भइसकेको छ ।

यस्तै, अगस्ट २४ मा चितवन, अगस्ट २६ मा पोखरा र अन्तिम प्रस्तुति अगस्ट ३१ मा बुटवलमा हुने तय भएको छ ।

अर्थर एक महिनाका लागि नेपाल आउन लागेका हुन् । उनले अगस्टमा चार शो गर्नेछन् । बाँकी शो सेप्टेम्बरमा हुनेछ । सन् २०२० को अमेरिकी आइडलमा फस्ट रनरअप भएयता उनी पहिलोपटक नेपाल आउन लागेका हुन् ।

गत महिना उनले लन्डनमा कन्सर्ट गरिसकेका छन् ।

दिवेशको नेपाल कन्सर्टको जिम्मा ब्रेनसर्भिसले लिएको छ । अमेरिकन आइडलको १८ औं सिजनका फाइनलिस्ट रहेका दिवेश १९ औँ सिजनमा पनि टप सेभेनसम्म पुग्न सफल भएका थिए ।