काठमाडौं । मौसमी सूचना प्रभावकारी बनाउने उद्देश्यले काठमाडौं–लुक्ला हवाई रुटमा इनरूट वेदर क्यामेरा जडान भएको छ । नेपाल नागरिक उड्डयन प्राधिकरणले राष्ट्रिय आविष्कार केन्द्रसँगको समन्वयमा मौसमी सूचना दिने क्यामेरा जडान गरेको हो ।

यसले गन्तव्य र प्रस्थान गर्ने विमानस्थलसँग रुटमा कस्तो मौसम छ भन्नेबारे प्रत्यक्ष जानकारी दिन्छ । प्राधिकरण र केन्द्रबीच अघिल्लो वर्ष यसबारे सम्झौता भएको थियो । सोही सम्झौता अनुसार यसअघि पोखरा–जोमसोम रुटमा क्यामेरा जडान भइसकेको छ ।

आवश्यकताका आधारमा थप अन्य गन्तव्यमा समेत इनरूट वेदर क्यामेराहरु जडान गरिने प्राधिकरणले जनाएको छ । यस्ता क्यामेरा सूर्योदयदेखि सूर्यास्तसम्म सञ्चालन हुनुपर्ने गरी सम्झौता भएको थियो । यस्ता क्यामेरा जडान र युसको सञ्चालन खर्च भने प्राधिकरणले बेहोरेको छ । काठमाडौं–लुक्ला रुट हवाई उडानका दृष्टिकोणबाट बढी जोखिमपूर्णमध्ये एक मानिन्छ ।