काठमाडौं । सन् २०२१ को जनवरीमा अमेरिकी पूर्वराष्ट्रपति डोनल्ड ट्रम्पका समर्थकद्वारा अमेरिकी संसद् भवनमा भएको दङ्गाको योजना बनाएको आरोपमा प्राउड बोइज समूहका एक पूर्वनेता लाई २२ वर्षको जेल सजाय सुनाइएको छ। क्यापिटल भनिने अमेरिकी संसद् भवनभित्र त्यसबेला भएको घटनामा संलग्नहरूलाई दिइएको यो नै सबैभन्दा लामो सजाय हो। उनलाई गत मे महिनामा सरकारविरुद्धको षड्यन्त्र र अन्य केही आरोपमा दोषी ठहर्‍याइएको थियो।

उनन्चालीस वर्षीय एनरिके तारिओ उक्त घटनाका समयमा वाशिङ्टनमा थिएनन् तर त्यहाँ भएको दङ्गामा उनले उक्त चरम दक्षिणपन्थी समूहको सङ्लग्नताको संयोजन गर्न सघाएका थिए। उक्त घटनामा संलग्नताको आरोपमा १,१०० भन्दा बढी मानिसहरू पक्राउ परेका छन्।

मङ्गलवार आफूमाथि हुने सजाय थाहा पाउनुअघि तारिओले भावुक भएर प्रहरी र वाशिङ्टन डीसीका मानिसहरूसँग सन् २०२१ जनवरी ६ को घटनामा आफ्नो संलग्नताका लागि माफी मागेका थिए। त्यति बेला जो बाइडनले राष्ट्रपतीय निर्वाचन जितेको प्रमाणित गर्नका लागि सांसदहरूको बैठक भइरहेका समयमा डोनल्ड ट्रम्पका समर्थकहरू संसद् भवनभित्र प्रवेश गरी आक्रमण गरेका थिए।

उनीहरूमाथि शोक र दुःख पर्न गएकामा म एकदमै लज्जित र दुःखित छु, वाशिङ्टनको सङ्घीय अदालतमा उनले भने। अब म आजीवन त्यो लज्जा बोकेर बाँच्नुपर्ने छ। बन्दीहरूले लगाउने सुन्तला रङको लुगामा आएका तारिओले भने, म आफ्नै लागि सबैभन्दा खराब शत्रु रहेछु।

सन् २०२० को नोभेम्बर महिनामा भएको निर्वाचनमा डोनल्ड ट्रम्प पराजित भएको स्विकार्दै तारिओले भने, म राजनीतिक कट्टरपन्थी होइन। हानि गर्नु वा चुनावी नतिजा बदल्नु मेरो उद्देश्य थिएन। चुनावको नतिजा बदल्नु सम्भव थियो भन्ने पनि मलाई लाग्दैन। कृपया ममाथि करुणा देखाउनुहोस्, तारिओले न्यायाधीशलाई भने कृपया मेरो ४० वर्षपछिको दशक मबाट नखोस्नुहोस्।

यसअघि एक पटक उनकी आमाले न्यायाधीशसमक्ष कम सजायको आग्रह गर्दा उनी रोइरहेको देखिएको थियो। तारिओ प्राउड बोइजका राष्ट्रिय अध्यक्ष थिए। सन् २०१६ मा न्यूयोर्क सिटीमा स्थापित यस चरम दक्षिणपन्थी समूहका सदस्यहरू यस समूहलाई पुरुष मात्र भएको साथै बसेर रमाइलोका लागि मदिरा सेवन गर्नेहरूको जमघट एक ड्रिङ्किङ क्लब का रूपमा व्याख्या गर्छन्।

यद्यपि उनीहरू आफूलाई ट्रम्पका सैनिक भएको पनि बताउँछन्। चरम वामपन्थी फासीवादविरोधीहरूसँग उनीहरूको बारम्बार झडप हुने गरेको छ। तारिओका वकिलले मङ्गलवार तारिओ किबोर्ड निन्जा र गलत दिशातर्फ निर्देशित देशभक्त भएको बताए। उनी रद्दी कुरा बोल्न उद्यत रहे पनि सरकार नै भङ्ग गर्ने उनको मनसाय नरहेको उनको दाबी थियो।

यद्यपि ट्रम्पद्वारा नै सिफारिस गरिएका न्यायाधीश टिमोथी केलीले विगतका कतिपय अवस्थामा तारिओले आफ्ना गतिविधिबारे पश्चात्ताप नगरेको बताए। सरकारविरुद्धको षड्यन्त्र गम्भीर कसुर हो, न्यायाधीशले भने। त्यो षड्यन्त्रका मुख्य नाइके तारिओ नै थिए। गत मेमा उनलाई अमनचयनमा अवरोध र षड्यन्त्र तथा सरकारी सम्पत्तिको विनाश जस्ता अभियोगमा पनि दोषी ठहर गरिएको थियो।

अभियोजकहरूले उनका गतिविधिलाई अपराधको सुनियोजित कदम भन्दै त्यसका लागि ३३ वर्षको कैद सजाय मागेका थिए। तारिओ पक्षका वकिलहरूले १५ वर्ष मात्र सजाय हुनुपर्ने माग गरेका थिए। न्यायाधीशले सजाय सुनाउँदा तारिओ चुपचाप बसेका थिए। अदालतबाट निस्कँदा उनले आफ्ना परिवारका सदस्यहरूलाई हात हल्लाए र शान्तिको सङ्केत बनाएर देखाए। उनका वकिलहरूका अनुसार तारिओले पुनरावेदन गर्ने योजना बनाएका छन्।

सन् २०२० को चुनावपछि तारिओ र उनको समूहका सदस्यहरूले ट्रम्पले राष्ट्रपति कार्यालय छाडेमा हिंसा भड्काउने धम्कीपूर्ण अनलाइन सन्देशहरू पठाएका थिए। सन् २०२१ को जनवरीको घटनाको दुई दिनअघि उनी वाशिङ्टन डीसी प्रवेश गर्दा उनलाई प्रहरीले रोकेका थिए।

आफूलाई अफ्रो-क्यूबन भनी चिनाउने तारिओलाई जनवरीको घटनाभन्दा तीन साताअघि ब्ल्याक लाइभ्स म्याटरु आन्दोलनको ब्यानर जलाएको आरोपमा पक्राउ गरिएको थियो। त्यति बेला उनका साथमा उच्च क्षमताको गोलीगट्ठा पनि भेटिएका थिए, जुन त्यहाँको कानुनअनुसार अवैध थियो।

त्यसपछि उनलाई धरौटीमा रिहा गरी राजधानीबाट निस्कन आदेश दिइएको थियो। घटना भएको दिन उनी बाल्टिमोरमा थिए। ट्रम्प समर्थकले संसद् परिसर घेराउ गरेपछि तारिओले एक अनलाइन सन्देशमा आफूले उक्त घटनाक्रमहरूबाट मजा लिइरहेको बताएका थिए। दङ्गामा संलग्नहरूलाई उनले भनेका थिए, जे गर्नुपर्ने हो गर। दङ्गाको योजनामा संलग्न नाइकेहरूको सजायबारे मङ्गलवार अदालतमा अन्तिम सुनुवाइ भएको थियो।

BBC