काठमाडौं । अस्ट्रेलियाको प्रतिनिधि सभाका सभामुख मिल्टन डिकले आगामी अक्टोबरमा नेपाल भ्रमण गर्ने भएका छन् । राष्ट्रिय सभाका अध्यक्ष गणेशप्रसाद तिमिल्सिनासँगको भेटमा नेपालका लागि अस्ट्रेलियाका राजदूत फेलिसिटी भोल्कले सभामुखको नेपाल भ्रमणबारे जानकारी गराएकी छिन् । अस्ट्रेलियाका राजदूत फेलिसिटी भोल्कले सिंहदरबारस्थित अध्यक्षको कार्यकक्षमा भेट गर्ने क्रममा अस्ट्रेलियाले नेपाललाई उच्च प्राथमिकतामा राखेको बताउँदै भ्रमणबारे जानकारी गराएकी हुन् ।

भेटमा द्विपक्षीय सम्बन्ध र पारस्परिक सहयोगबारे छलफल भएको थियो। अध्यक्ष तिमिल्सिनाले नेपाली विद्यार्थीको आकर्षक शैक्षिक गन्तव्यका रूपमा अस्ट्रेलिया परेको बताउँदै छात्रवृत्तिको सङ्ख्या बढाउन आग्रह गरे । उनले यसप्रकारको व्यवस्थाले धेरै विद्यार्थी लाभान्वित हुने बताए ।

नेपाल र अस्ट्रेलियाबिच सन् १९६० मा कूटनीतिक सम्बन्ध स्थापना भएको हो। अध्यक्ष तिमिल्सिनाले अस्ट्रेलियामा विभिन्न पेसा र व्यवसायमा ठूलो सङ्ख्यामा अस्ट्रेलियामा नेपाली रहेको बताउँदै दुई देशबिचमा सिधा हवाई उडान सञ्चालन गर्न सके दुवै देशले लाभ लिन सक्नेमा जोड दिए ।

सो अवसरमा राजदूत भोल्कले अस्ट्रेलियामा एक लाख ३० हजारभन्दा बढी नेपालीको बसोबास रहेको जानकारी गराइन् । उनले क्यानबेरामा बढी बोलिने भाषामा नेपाली भाषा तेस्रो स्थानमा रहेको जानकारी गराएकी छिन् ।