समाचार

बढ्न थाल्यो गर्मी, कुन शहरमा कति पुग्यो तापक्रम ?

काठमाडौं । देशभर गर्मी बढ्न सुरु भएको छ । मौसम पूर्वानुमान महाशाखाका अनुसार प्रिमनसुन शुरु भएसँगै तापक्रम बढ्छ । मार्च पहिलो साता अर्थात फागुन अन्तिमबाट तापक्रम बढ्न थालेको हो । तराईका धेरै ठाउँको तापक्रम ३० डिग्री सेल्सियसभन्दा माथि पुगिसकेको छ ।

आइतबार जनकपुरको तापक्रम ३५ दशमलव २ डिग्री सेल्सियस, धरानको ३४ डिग्री सेल्सियस, विराटनगरको ३३ दशमलव ६ डिग्री सेल्सियस, सिमराको ३३ दशमलब ८ डिग्री सेल्सियस, भैरहवाको ३२ दशमलव ६ डिग्री सेल्सियस, नेपालगञ्जको ३१ दशमलव २ डिग्री सेल्सियस, धनगढीको ३१ डिग्री सेल्सियस, दिपायलको ३० दशमलव ५ डिग्री सेल्सियस र वीरेन्द्रनगरको ३० दशमलव १ डिग्री सेल्सियस मापन भएको छ ।


आज पनि यही हाराहारीमा तापक्रम पुग्ने महाशाखाको अनुमान छ । प्रिमनसुनको समय मार्च, अप्रिल र मे महिनामा तापक्रम बढ्ने महाशाखाको भनाई छ । यस वर्ष प्रिमनसुनको समयमा ३० देखि ४० डिग्री सेल्सियस तापक्रम रहने गर्छ । आज मधेश र कोशी प्रदेशसहित देशका पहाडी भेगमा आंशिक बदलीको सम्भावना रहेको छ ।

अरु बाँकी भागमा मौसम सफा रहेको मौसम पूर्वानुमान महाशाखाले जनाएको छ । कोशी, गण्डकी र सुदूरपश्चिम प्रदेशका उच्च पहाडी तथा हिमाली भूभागका एकदुई ठाउँमा आज हिमपातको सम्भावना रहेको महाशाखाले जनाएको छ । महाशाखाका अनुसार आज पानी पर्ने सम्भावना छैन ।