काठमाडौं । नेपालका गुम्बा र चैत्यहरुको अवलोकन गर्न चार्टर विमानमा काठमाडौं २ सय १८ जना भियतनामी पर्यटक काठमाडौं आएका छन् । उनीहरु एक साता नेपालमा बसेका हुन् । उनीहरु शनिबार स्वदेश फर्किँने कार्यक्रम छ । एक साताका लागि नेपाल आएका उनीहरुले ७ रात ८ दिन नेपालमा बिताएको रुप्से होलिडेजका प्रबन्ध निर्देशक रमेश पराजुलीले बताए ।

पराजुलीका अनुसार, यी भियतनामी बौद्ध धर्मावलम्बीहरूले काठमाडौं उपत्यकका विभिन्न बौद्ध गुम्बा र चैत्यहरूको भ्रमण गरे । ‘बिहीबार उनीहरु हेलेसी गएँ,’ पराजुलीले भने, ‘आज उताबाट फर्केर भोलि हिमालय एयरलायन्सको चार्टर विमानमा भियतनाम फर्किंदै छन् ।’

‘हृवाइट गुम्बा, फर्पिङ, स्वयम्भू, नमोबुद्ध र पाटनको भ्रमण अवलोकन गर्ने यी पर्यटकहरुले नेपाल बाट बुद्धको सन्देश बोकेर जाँदैछन् । त्यसैले यो समूहको भ्रमणलाई अन्तर्राष्ट्रिय धार्मिक पर्यटनका क्षेत्रमा महत्वपूर्ण उपलब्धिको रूपमा लिएका छौं,’ रुप्सेद्वारा जारी विज्ञप्तिमा भनिएको छ । रुप्सेले यत्रो संख्यामा चार्टर विमानमार्फत पर्यटक आएको पहिलो भएको दाबी गरेको छ ।