काठमाडौं । विश्व नम्बर १ यानिक सिनरले टेलर फ्रिट्जको चुनौती पार गर्दै आइतबार यूएस ओपन(२०२४ को उपाधि जितेका छन् । यो वर्ष उनले जितेको यो दोस्रो ग्रान्ड स्लाम उपाधि हो । उनले जनवरीमा अस्ट्रेलियन ओपनको उपाधि पनि हात पारेका थिए । फ्लेसिङ मेडोसमा भएको फाइनलमा इटालीका सिनरले अमेरिकी प्रतिद्वन्द्वी फ्रिट्जलाई ६–३, ६–४ र ७–५ ले हराए । सन् १९७७ यता सिनर आफ्ना सुरुआती दुई ग्रान्ड स्लाम उपाधि एकै वर्ष जित्ने पहिलो खेलाडी पनि बने ।

यसअघि यस्तै उपलब्धि गुलेरमो भिलासको नाममा थियो । यस्तै २३ वर्षीय सिनर यूएस ओपनको पुरुष एकल जित्ने पहिलो इटालीका खेलाडी पनि बने । डोपिङको आरोपबाट मुक्त भएको १९ दिनपछि उनले अहिलेको सफलता आत्मसात् गरेका हुन् ।मार्चमा दुई पल्ट उनी शक्तिवर्द्धक प्रतिबन्धित औषधि प्रयोगमा दोषी पाइएको थियो ।