दिपक राज पाण्डे, न्युयोर्क ।

बिगत ८ वर्षदेखि निरन्तर सञ्चालनमा रहेको सरल नेपाली भाषा तथा संस्कृति केन्द्र (www.SNLCC.org) ले सेप्टेम्बर ०८, २०२४ आइतबारका दिन संस्थाको आठौँ वार्षिक उत्सव एवम् वार्षिक पटलक वनभोज कार्यक्रम सम्पन्न गरेको छ। हरेक वर्ष कक्षामा सहभागी हुने विद्यार्थीहरु तथा परिवार सहित मनाउँदै आएको वार्षिक कार्यक्रम यो वर्ष पनि न्युयोर्कस्थित फरेष्ट पार्कमा सम्पन्न गरेको हो ।

फोटो सौजन्य: हाम्रो फोटो डट् कम्

२ जना शिक्षिका सरस्वती राई सहित ८ जना विद्यार्थीहरूबाट एउटा स्टुडियोमा शुरु भएको यस भाषा पाठशालामा हाल प्राविधिक, शिक्षक, बोर्ड, स्वयंसेवक गरी करिव २५ जनाको टिम छ भने १८० को हाराहारीमा अमेरिका, युरोप, फ्रान्स लगायतका विद्यार्थीहरू अनलाइनमा नै अध्ययन गर्दै आएका छन् । केन्द्रले नेपालवाहेक कुनै पनि राष्ट्रबाट विद्यार्थीहरूले नि:शुल्क अध्ययन गर्न पाउने व्यवस्था समेत मिलाइएको छ ।

शिक्षकको हकमा भने नेपालबाट पनि लिने गरिएको छ । विद्यार्थी शिक्षक दुवैमा प्रतिवद्धताको भने अवश्यकता देखिन्छ । शिक्षकको हकमा कुनै आकस्मिक अवस्थाबाहेक कम्तिमा एक वर्ष र ८० प्रतिशत हाजिर हुनै पर्ने नियम छ । त्यसैगरी विद्यार्थीहरूको हकमा कुनै खबर नगरी ३ पटकसम्म अनुपस्थित रहेमा स्वत: कक्षाबाट हटाउने नियम छ | किनकि हाजिर अनियमित हुँदा स्वयमको पढाइ छुट्ने तथा नियमित पढाइमा रहेका अन्य विद्यार्थीलाई पढाइमा वाधा पुग्ने देखिन्छ ।प्राविधिक समस्याले कुनै बाधा नहोस् भनेर एउटा लिड र एउटा सहायक (संस्थाकै पूर्व विद्यार्थी) गरी हरेक कक्षामा २ जना शिक्षकहरू रहन्छन् । सम्पूर्ण शिक्षकहरू स्वयंसेवक भएकोले नि:शुल्क पठनपाठन हुने यो संस्थामा इच्छुक शुभचिन्तक/ अभिभावकहरूले जुनसुकै ठाउँमा स्वेच्छाले सहयोग भने गर्न सक्छन् |

कार्यक्रममा भाषा स्कुलबाट यही महिना भएको वार्षिक परिक्षामा उत्तीर्ण विद्यार्थीहरूलाई प्रमाण पत्र तथा गुडी व्याग वितरण गरिएको थियो । यसैगरि हरेक कक्षामा सबैभन्दा नियमित उपस्थित हुने र गृहकार्य गर्ने विद्यार्थीहरुलाई उनीहरूले प्राप्त गरेको स्टारको आधारमा पुरस्कार समेत बितरण गरिएको थियो । केन्द्रमा केही वर्ष यताबाट अहिलेसम्म स्वयंसेवक भइ सहयोग पुर्याउनु भएकोमा पूर्व विद्यार्थी निनिमा राई, पूजा श्रेष्ठ, समुन्द्र दाहाल एवं शुरुमा कक्षा संचालन गर्न स्थान उपलब्ध गराउनु हुने कराँते गुरुहरू (सेनसिइ शान्ता थोकर र पर्खी राई) लाई स-धन्यवाद मायाको चिनो प्रदान पनि गरिएको थियो ।

कार्यक्रममा अभिभावकहरू, वाणिज्यदुत बिष्णु कुमारी अधिकारीज्यू, सह-वाणिज्यदुत संगीता न्यौपानेज्यू लगायत, भाषा/ साहित्यको अभिभावक संस्था अनेसास बोर्ड अफ ट्रष्टी, न्यूयोर्क च्याप्टर, फोटोग्राफर अशोक पन्त, सन्चारकर्मीहरु लगायत न्यूयोर्कमा रहेका विभिन्न संस्थाका विशेष व्यक्तित्वहरूको पारिवारिक उपस्थिति राम्रै थियो ।

यो कुनै औपचारिक कार्यक्रम नभइ नितान्त स्कुल परिवार र साथीभाइको जमघट कार्यक्रम भएकोले गर्दा संस्थागत नभइ पारिवारिक रूपमा नै सबैको सहभागिता रहेको थियो । करिव २५० भन्दा बढीको उपस्थिति रहेको कार्यक्रम विहान ११ बजेदेखि साँझ ५ बजेसम्म चलेको थियो ।

कार्यक्रमको उद्घोषण संस्थाकी उपाध्यक्ष यशोदा राईले गर्नु भएको थियो भने सदस्य हजुरी शाह कंडेलले गीत गएर तथा विद्यार्थीहरू गरिमा राना, आभा भण्डारी, प्राची बिसुन्के लिम्बू र एन्जेला शाहले नृत्य प्रस्तुत गरेर श्रोता/ दर्शकहरूलाई मनोरन्जन दिएका थिए । आठौँ वार्षिक उत्सवको केक काटेर कार्यक्रमको समापन गरिएको थियो ।