काठमाडौं । अमेरिकी पूर्वराष्ट्रपति डोनल्ड ट्रम्पको फ्लोरिडास्थित आफ्नै गल्फ कोर्समा उनलाई हत्या गर्ने दोस्रो प्रयास भएको अमेरिकी सञ्चारमाध्यमले जनाएका छन् । उनी सुरक्षित रहेको अमेरिकी अधिकारीहरूले पुष्टि गरेका छन्। घटनामा संलग्न भएको ठानिएका एकजना सम्भावित संदिग्धलाई हिरासतमा लिइएको उनीहरूले बताएका छन्।

सीक्रेट सर्भिस एजेन्टहरूले झाडीबाट राइफलले ताक्दै गरेको देखेको र लगत्तै उनीहरूले उक्त व्यक्तिमाथि गोली प्रहार गरेको अधिकारीहरूको भनाइ छ। त्यस बेला ट्रम्प त्यहाँ गल्फ खेलिरहेका थिए। राइफल ताकिँदै गर्दा ट्रम्प २७५ देखि ४५५ मिटरजति मात्र टाढा रहेको एफबीआईले जनाएको छ।

एउटा एके–४७ जस्तै बन्दुक, दुईवटा झोलाहरू, एउटा गोप्रो क्यामेरालगायतका सामग्री घटनास्थलमा फेला परेका छन्। प्रत्यक्षदर्शीका अनुसार ती सन्दिग्ध व्यक्तिलाई पछि सुरक्षाकर्मीले धेरै पटक गोली प्रहार गरेका थिए। त्यसपछि कोही झाडीबाट भागेर कालो निसान कारमा हामफालेको देखिएको थियो। ती प्रत्यक्षदर्शीले उक्त गाडी र त्यसको नम्बर प्लेटको तस्बिर लिएका थिए। त्यो गाडी पछि मार्टिन काउन्टीमा रोकियो।

अमेरिकी सञ्चारमाध्यमहरूले पक्राउ परेका व्यक्ति हवाई निवासी ५८ वर्षका पुरुष रहेको जनाएका छन्। आफ्ना समर्थकहरूलाई पठाएको इमेलमा ट्रम्पले आफू सुरक्षित र राम्रो अवस्थामा रहेको बताएका छन्। यसअघि पेन्सिल्भेनिआको एउटा चुनावी र्‍यालीमा एक जना बन्दुकधारीले ट्रम्पमाथि गोली प्रहार गरेका थिए। त्यस क्रममा उनको कानमा गोली लागेको थियो। उनको हत्या प्रयासका रूपमा उक्त घटनालाई हेरिएको थियो। पेन्सिलभेनिआमा भएको आक्रमणको दुई महिनापछि पछिल्लो घटना भएको हो।