दीपकराज पाण्डे, न्युयोर्क

बजारमा निस्कने थुप्रै गीतहरुको माझ योगेश आदीको रचना र स्वरमा “तिम्रै बजारमा” युट्युब मार्फत म्युजिक भिडियो सहित सार्वजनिक भएको छ । बियोगान्त भावको गीत उनले रक शैलीमा गाएको छ । न्युयोर्कका संगीतकर्मी ओम कर्माचार्यको संगीत र छायाँकन रहेको गीतको सम्पुर्ण कार्यसम्पादन न्युयोर्क सहरमा गरिएको हो ।

योगेशसँग संगत गरेको करिव ३० वर्षमा मैले उसलाई नेपाल ‘ल’ क्याम्पसको छतदेखि पार्टी पिकनिकसम्म सुनेको छु । ऊ लेख्ने मान्छे हो भन्ने धेरैलाई थाहा हुनसक्छ तर “तिमीले गाउन पनि सक्छौ, गाऊ !” भनेर उत्प्रेरणा गर्ने मध्ये म पनि हुँ । समग्रमा योगेश सम्भावनाको खानि हो । उसले के के जान्दैन ? भन्दापनि ‘के चाहिँ जान्दैन ?’ भनेर म सधै भनि राखेको हुन्छु । उनको हरेक प्रयासले त्यो बिधालाई न्याय गर्ने कुरामा म विश्वास राख्छु ।

आजभन्दा करिव ११ वर्ष अघि योगेशको रचनामा निस्किएको गीति एल्बम् “शाश्वत संसार” मैले कैयौ पटक सुनिसकेपछि तिमीले अरुपनि गीतहरु लेख्नुपर्छ भनेर भनिराख्थें । आज गाएर नै संगीत प्रतिको थप समर्पण पेश गरेको छ ।

योगेशको रचना सधै यथार्थपरक हुने गर्छ । उनले लेखेको सयौं लेख रचनाहरु मात्र होइन कि उनको करिव १८ बर्ष पहिले प्रकाशित कविता संग्रह “मेरो दुरबिनबाट” नै तथ्य पुष्टि हुन्छ ।

योगेशको नयाँ कृतिले उनलाई थप उर्जा प्रदान गर्नेछ । यो ट्रेजेडी रक गीतले नयाँ पुस्ताको मात्र होइनकि सबैको मन छुनेछ भन्ने विश्वास लिएको छु । शुभकामना !