काठमाडौं । राष्ट्रपति डोनाल्ड ट्रम्पको शपथग्रहणको अन्तिम तयारी चलिरहेको छ । समारोह आयोजक समितिले राष्ट्रपति ट्रम्पको यो दोस्रो कार्यकाल भव्य रूपमा आयोजना गर्ने गरी तयारी सुरु गरिसकेको बताइएको छ । सबै मुख्य चन्दादातालाई समेत यो कार्यक्रममा सामेल गर्न नसकिने सम्भावना पनि व्यक्त गरेको छ । यो चन्दा रकम सो दिनसम्म पुग्दा २० करोड डलर पुग्ने अनुमान गरिएको छ ।

अघिल्लो पटक यही कार्यक्रमका लागि जम्मा १० करोड चन्दा उठेको थियो । चन्दादाताहरू सो समारोहमा उपस्थित भएर आफ्नो व्यवसाय वा व्यापारका लागि लबिङ गर्न लालायित हुने भएकाले यसरी चन्दा सङ्कलन भएको हो । यो समारोहमा सर्वाधिक चर्चित व्यक्ति तथा संसारकै सबैभन्दा धनी व्यक्ति एलन मस्क रहने भएका छन् । मार्क जुकरवर्ग र जेफ बेजोज पनि उपस्थित हुनेछन् ।

यी तीन जना मन्त्रीहरूकै लहरमा रहने भएका छन् । सोही लहरमा तीन जना पूर्वराष्ट्रपति पनि उपस्थित हुनुहुने छ । पूर्वराष्ट्रपतिहरू बाराक ओबामा, बिल क्लिन्टन र जर्ज डब्लु बुस सो समारोहमा सहभागी हुने भएका छन् । ओबामापत्नी मिसेल ओबामा भने उपस्थित नहुने बताइएको छ ।

अमेरिकास्थित विदेशी मुलुकका राजदूतावासका राजदूत तथा नियोग प्रमुखहरूलाई निमन्त्रणा पठाइने भएकाले विदेशी राष्ट्रप्रमुखहरूको उपस्थिति भने ज्यादै न्यून हुने बताइएको छ । चन्दादाताको नामावली लामो छ तर पनि मेट्रा, अमेजन, गोल्डमेन स्यान्च, बैङ्क अफ अमेरिकालगायतका संस्था तथा खुला एआईका मुख्य कार्यकारी अधिकृत स्याम एल्ट्रम्यान, उवरका प्रमुख कार्यकारी डारा खोस्रोसाही र सिट्राडोलका प्रमुख कार्यकारी केन ग्रिफिनलगायतले १० लाख डलरभन्दा बढी चन्दा दिएका छन् ।

लोकगायिका क्यारी अन्डरउड यो कार्यक्रमकी सर्वाधिक चर्चित गायिका हुने भएकी छिन् । शपथग्रहण समारोहकी प्रमुख गायिका अन्डरउड र वाइएमसिए नामक गीत गाएर चर्चा बटुलेको भिलेज पिपुल नाम गरेको ब्यान्डले सम्पूर्ण समारोह तताउने छ । अन्डरउडले जनवरी २० मा अमेरिका दी ब्युटिफुल र गड ब्लेस दी युएसए नामक गीत गाउनुहुने छ । केही लोकगायक जेसन एल्डन, रास्कन फ्याल्ट्रस, किड रक र विली रे साइरस र क्रिस्ट्रोफर मासिनो आदिले पनि आआफ्नो प्रस्तुति दिने भएकाछन् ।