दोहा, ९ जेठ (रासस–सिन्ह्वा) । कतारी अमिर शेख तमिम बिन हमाद अल थानीले अमेरिकी राष्ट्रपति डोनाल्ड ट्रम्पसँग क्षेत्रीय विकासक्रमबारे छलफल गर्नुभएको अमिरको प्रशासनिक कार्यालयले एक विज्ञप्तिमा उल्लेख गरेको छ। टेलिफोन वार्ताको क्रममा उनीहरुबीच यस क्षेत्रमा थप तनाव रोक्न र अन्तर्राष्ट्रिय शान्ति र सुरक्षा कायम गर्न पाकिस्तानको नेतृत्वमा कूटनीतिक प्रयासहरूको समर्थनमा केन्द्रित भएको विज्ञप्तिमा भनिएको छ।

उनीहरुले वर्तमान मुद्दाहरूलाई सम्बोधन गर्न, समुद्री सुरक्षा र रणनीतिक जलमार्गहरूको सुरक्षा गर्न र विश्वव्यापी ऊर्जा आपूर्ति र आपूर्ति श्रृङ्खलाको सहज प्रवाह सुनिश्चित गर्न संवाद च्यानलहरू कायम राख्नुपर्ने महत्त्वमा जोड दिएका छन् । अमिरले सङ्कटलाई नियन्त्रण गर्ने र क्षेत्रीय स्थिरता बढाउने उद्देश्यका साथ शान्तिपूर्ण समाधान र कूटनीतिक पहलको समर्थनमा कतारको निरन्तर अडानलाई दोहोर्याएको बताइएको छ ।

यो फोनवार्ता ‘स्ट्रेट अफ हर्मुज’ वरपरको निरन्तर क्षेत्रीय तनाव र विश्वव्यापी ऊर्जा बजार र समुद्री व्यापार मार्गहरूमा सम्भावित प्रभावको बारेमा बढ्दो अन्तर्राष्ट्रिय चासोको बीचमा आएको हो। प्राकृतिक ग्यास निर्यात गर्ने प्रमुख मुलुक कतारले बारम्बार तनाव कम गर्न आह्वान गर्दै नौवहनको स्वतन्त्रता र क्षेत्रीय स्थिरताको संरक्षणको महत्त्वमा जोड दिँदै आएको छ ।