बेइजिङ, २ साउन (रासस–एएफपी) । वाशिङ्गटनले अमेरिकामा पत्रकारहरूको बसाइ अवधि छोट्याउने नियम अन्तिम रूप दिएको भोलिपल्ट चीनले शुक्रबार ‘प्रतिकारात्मक कदम’ चाल्न सक्ने चेतावनी दिएको छ। यसमा चिनियाँ नागरिकहरूलाई सबैभन्दा कडा सीमा लागू हुने भएको छ। सेप्टेम्बरदेखि लागू हुन सक्ने यो परिवर्तनअनुसार विदेशी पत्रकारहरूलाई अमेरिकामा मात्र २४० दिन ९करिब आठ महिना० बस्न पाइने छ, तर त्यति नै थप अवधिको विस्तारका लागि आवेदन दिन सकिनेछ ।

वाशिङ्गटनको गृह सुरक्षा विभागले प्रस्ताव गरेको नियमअनुसार चिनियाँ नागरिकहरूलाई भने केवल ९० दिनको बसाइ सीमा तोकिएको छ र नयाँ आवेदनपछि ९० दिनको विस्तार मात्र सम्भव छ । “चीनले विशिष्ट देशहरूलाई लक्षित गर्दै अमेरिकाले गरेको भेदभावपूर्ण कार्यको दृढतापूर्वक विरोध गर्दछ,” बेइजिङको विदेश मन्त्रालयका प्रवक्ताले भने । “चीनले अमेरिकालाई चिनियाँ पत्रकारहरूप्रति लागू गरेको भेदभावपूर्ण नीति तत्काल खारेज गर्न माग गर्दछ,” लिन जियानले नियमित पत्रकार सम्मेलनमा भने ।

“चीनले पारस्परिक प्रतिकारात्मक कदम चाल्ने अधिकार सुरक्षित राख्छ,” उनले भने । नयाँ अमेरिकी भिसा सीमाहरू ट्रम्पले आफ्नो राष्ट्रपति कार्यकालको मुख्य एजेन्डा बनाएको व्यापक आप्रवासन कडाई अभियानको हिस्सा हुन् । यसमा ठूला शहरहरूमा आक्रामक कारबाहीदेखि लिएर नागरिकताको कानुनी बाटोमा नयाँ प्रतिबन्धहरू समावेश छन् ।

मिडिया अधिकार समूहहरूले नयाँ नियमको आलोचना गरेका छन् । रिपोर्टर्स विदाउट बोर्डर्स (आरएसएफ)ले बिहीबार एएफपीलाई दिएको प्रतिक्रियामा यस सीमिततालाई ‘आक्रोशजनक’ निर्णय भएको बताएको छ । नयाँ नियमहरू रिपब्लिकनहरूको बाहुल्यता रहेको अमेरिकी काङ्ग्रेस (संसद्)बाट समीक्षा हुन बाँकी छन् ।